Tjaldsvæðið við Reykjamörk er í gróðursælu umhverfi þar sem aðstaða er öll hin besta. Salerni, sturtur, þvottavél og þurrkherbergi er að finna í aðstöðuhúsi á tjaldsvæðinu. Í aðstöðuhúsinu er upplýsingaathvarf þar sem meðal annars má finna upplýsingar um gönguleiðir í og við Hveragerði. Við aðstöðuhúsið er einnig yfirbyggt skýli með vöskum og borðum þar sem er upplagt að tylla sér og borða nestið sitt. Á svæðinu er boðið upp á losun fyrir húsbíla og þar er líka hægt að komast í rafmagn.